"Adat Budaya Aceh" As-Sallamu'alalaikum,hai Aneuk Nanggroe, Gata loen pugoe,hai Aneuk Bangsa, Beklei tanyoe duek,lalei lam sag...
"Adat Budaya Aceh"
As-Sallamu'alalaikum,hai Aneuk Nanggroe,
Gata loen pugoe,hai Aneuk Bangsa,
Beklei tanyoe duek,lalei lam sagoe,
Marwah tapuwoe,geutanyoe puga,
Tanyoe peubeudoeh,mandum tapugoe,
Beklei tapakoe,budaya luwa,
Jinoe tapapah,atra droe keudroe,
Sama tapakoe,tanyoe peularha,
Ngoen kruseumangat,tapeusaboeh droe,
Agam ngoen binoe,tuha ngoen muda,
Aneuk mit cut cut,tanyoe peurunoe,
Supaya meuhoe,di aneuk bangsa,
Bek sampee ancoe,atra droe keudroe,
Sama tahiroe,geutanyoe jaga,
Atra keuneubah,geutanyoe pakoe,
Bek tajak gantoe,budaya luwa,
Kageupeh canang,ureung toep toep droe,
Meunyan keuh bagoe,seuni budaya,
Ureung toep Daboeh,kahan luet asoe,
Lheuh nyan loem dudoe,deungoen Rebana,
Geupeh Rapa'i,meunari jaroe,
Dikeei hai adoe,seulaweut geuba,
Ranup Lampuan,meunari putroe,
Kaheuhias droe,catek lagoeina,
Meunan cit Saman,lagak han bagoe,
Adat Aceh nyoe,beugoet tajaga,
Meunyoe Seudati,dimeu'en jaroe,
Bak prut geupeh droe,jeut keuirama,
Panggong meuhayak,keudeh ngoen keunoe,
Garang han bagoe,watee acara,
Tanyoe peunontoen,taproek proek jaroe,
Seunang han bagoe,oh taeu nyata,
Wahee rakan loen,hai Aneuk Nanggroe,
Adat Aceh nyoe,beugoet tajaga,
Bek sampee gadoeh,ancoe han meuhoe,
Hanapat tabloe,laen tamita,
Beudoeh beusaree,tameumat jaroe,
Aduen ngoen adoe,beusapu haba,
Bekna yang pakee,karu sabei droe,
Mangat meusampoe,Aceh nyoe jaya,
Hanya keuh ohnan,nibak uroe nyoe,
Meumada ohnoe,Ca'e loen rika,
Meupatna salah,meu'ah keuloen nyoe,
Bek sampei dudoe,uloen meudesya,
Saleum Aneuk Nanggroe
By: Nardi Dinata
Mantap,
BalasHapus